Warning: The magic method Vc_Manager::__wakeup() must have public visibility in /home/yaavarum/public_html/mag.yaavarum.com/wp-content/plugins/js_composer/include/classes/core/class-vc-manager.php on line 203
நீரை மகேந்திரன் கவிதைகள் - யாவரும்
Wednesday, November 18, 2026
Home புனைவு கவிதை நீரை மகேந்திரன் கவிதைகள்

நீரை மகேந்திரன் கவிதைகள்

0

அகலாத நினைவு சொல்லும் நன்றி..நன்றி..

வழக்கமாக செல்லும் பாதையில்
இருந்து விலகி
நினைவு தவறியவனாய் பழைய பாதையில் சென்றுவிட்டேன்.
அது முன் தங்கியிருந்த வீட்டுக்கு சென்றது
ஒரு திரைப்படத்தில் பார்த்த
நினைவுத் துண்டென..
அவ்வீட்டின் அழைப்பு மணியை அழுத்திய பின்னர்,
நான் வசிக்கும் வீடில்லை என அறியும் கணத்தில் கதவு திறக்கப்பட்டது.
உலோக கம்பிகளால் தடுக்கப்பட்ட
அவ்வானத்தின்
ஒவ்வொரு அறையாக சென்று திரும்புகிறேன்
அந்த குரல்கள் ஒலிக்கவென.
அது என் வீடில்லை
வலசைப் பறவைகள் களித்த கானகம்
அந்திச் சாயலின் சிணுங்கொலி
படித்த வீட்டில்
யாரோ நிற்கிறார்கள்.
புது வண்ணமேறிய
கூடாரத்தில்
பழைய மோஸ்தரை பார்க்க ஏதுமில்லை
இல்லாத எதுவும்
காணாத எதுவும்
அசரீரியைப் போல ஒலிக்கின்றன
அகலாத நினைவு சொல்லும் நன்றி..நன்றி.

***

ஒரு லெஃப்டில் காலியாகும் இருக்கை

அச்சம் தரும் இந்த காலத்தின் அலுவலகம் வாட்ஸ் அப் பில் இயங்குகிறது
மின்னணு அடையாள அட்டைக்கு திறக்கும் கதவு போல
ரெடி டூ ஷிப்ட் கதவுகள் எமோஜியுடன் திறக்கப்படுகின்றன.
எல்லாவற்றுக்கும் முந்திக்கொள்பவன்
ஒரு ஸ்மைலியை தட்டிவிட்டு
பல் துலக்கச் செல்கிறான்
வொர்க் ப்ரம் ஹோமில்,
அதிகாலையிலேயே கண்விழித்து விடுகிறது அலுவலகம்
காலியான இருக்கை நிரம்பும்போது காட்டப்படும் ஸ்நேகிதம் இல்லை
அங்கிருந்தே தொடங்கிவிடுகிறது சமூக விலக்கல்…
இசைநாற்காலி போல ஆட்கள் நழுவுகிறார்கள் ஒரு லெஃப்டில்…
தேநீர் பருகியபடி பேசும் ரகசியங்கள் இல்லாத அலுவலகம் நம்பிக்கை இழக்கிறது
மேலும் மேலும் ஸ்மைலிகள் தட்டப்படுகின்றன.
நள்ளிரவிலும் எவனோ ஒருவன்
திரும்பி பார்த்துக்கொண்டிருக்கும் அலுவலகத்துக்கு..
ரகசியமாக வந்து செல்கின்றனர்
அலுவலக சிப்பந்திகள்.

***

பன்னீர்புஷ்பங்கள் யார் எடுத்தது?

ஆளில்லாத எதிர்முனைக்கு
சைகையில் பேசும்
எனக்கு என்ன பெயர் வைப்பீர்கள்?
அதேதான்..
அதனுடன்
கொஞ்சம் கொதிநீரை சேருங்கள்
இந்த வேடிக்கையில் வீச.

*
எதற்கிந்த ஆட்டம்
நிறுத்தி விடலாம்
ராணி இல்லாத கட்டங்கள்
கழுத்தை நெரிக்கின்றன
போராட்டம் எதற்கு
வெற்றி எதற்கு
தற்காப்புதான்
ஆட்டத்தை கலைக்கும்
இந்த கனமா?

*
அப்படியா?
ஆமாம்
அந்த காயத்தில்தான்
நீங்கள் உப்பைத் தடவியது.
காயம் ஆறிவிட்டது
வாருங்கள்
ஒன்றாக ஒரு தேநீர் அருந்துவோம்.

*
யார் யாரோ சொன்னது
யார் யாரோ கேட்டது
அதெல்லாம்
உண்மையில்லை.
என்னைப்பற்றி
நான் சொல்வதும் பொய்.

*
பன்னீர்புஷ்பங்கள்
யார் எடுத்தது?
இந்த வேடிக்கையான கேள்வியை
எங்கு பேசினோமா?
மீண்டும் தொடங்கும் உரையாடலில்
மீண்டும் இடம்பெறும்
பன்னீர்புஷ்பங்கள்.

*
முதலில்
ஒன்றை பகிர்ந்து கொண்டோம்
பிறகு மற்றொன்றை
பகிர்ந்து கொண்டோம்
இரண்டு பசி
பசியாறியது.
*

  • நீரை.மகேந்திரன்

LEAVE A REPLY

Please enter your comment!
Please enter your name here