ரூபன் சிவராஜா

கொரோனா பெருந்தொற்றுப்பரம்பலைக் கட்டுப்படுத்துவதற்கான தனிநபர்-சமூக முடக்கங்கள் தொடர்கின்ற அதேவேளை, பல்வேறு நாடுகள் தடுப்பூசிகளை மக்களுக்குச் செலுத்தத் தொடங்கிவிட்டன. கடந்த 2020 டிசம்பரிலிருந்து தடுப்பூசி செலுத்துகின்ற செயற்பாடுகள் இடம்பெற்று வருகின்றன. உலகளாவிய மானிடப் பேரவலத்தை ஏற்படுத்திய இந்தத் தொற்றுக்கு எதிரான தடுப்பூசியிலும் அரசியல் செல்வாக்குச் செலுத்துகின்றது என்பது இதிலுள்ள கசப்பான யதார்த்தம். மனிதாபிமான மற்றும் மருத்துவ அடிப்படைகளுடன் நீதியான முறையில் மேற்கொள்ளப்பட வேண்டிய – நாடுகளுக்கிடையிலான தடுப்பூசி பங்கீட்டில் – பொருளாதார பலம்மிக்க நாடுகள் பெரும் செல்வாக்குச் செலுத்துகின்றன.

முந்திக்கொண்ட செல்வந்த நாடுகள்

அதாவது அமெரிக்கா, கனடா, பிரத்தானியா, அவுஸ்திரேலியா, ஜப்பான் மற்றும் பல ஐரோப்பிய நாடுகள் தமது ஒட்டுமொத்த மக்களுக்கும் ‘பல தடவைகள்’ செலுத்துவதற்குத் தேவையான தடுப்பூசிகளை கொள்வனவு செய்துள்ளன. உலகெங்கிலும் உற்பத்தி செய்யப்பட்டுள்ள, மற்றும் உற்பத்தியில் உள்ள மொத்தத் தடுப்பூசிகளில் அரைவாசிக்கும் மேல் ஏலவே கொள்வனவு செய்துள்ளதோடு மேலதிக கொள்வனவு ஒப்பந்தங்களையும் இந்நாடுகள் செய்துள்ளன. இந்தச் செல்வந்த நாடுகள் உலகின் மொத்த மக்கட்தொகையின் 15 வீதம் மட்டுமே. இன்னும் விரிவாகச் சொல்வதானால் உதாரணமாகக் கனடாவை எடுத்துக்கொண்டால், நாட்டின் முழு மக்களுக்கும் 6 தடவைகள் வரை போடுவதற்குப் போதுமான தடுப்பூசிகளைக் கொள்வனவு செய்துள்ளது. அமெரிக்கா மற்றும் பிரித்தானியா நான்கு தடவைகளும், பெரும்பாலான ஐரோப்பிய நாடுகள் 2 தடவைகளுக்குரிய கொள்வனவுகளையும் செய்துள்ளன. கொள்வனவு என்பது ஏலவே கொள்வனவு செய்யப்பட்டதும் மேலதிக கொள்வனவுக்கான ஒப்பந்தங்களையும் குறிக்கின்றது.

2021 நடுப்பகுதிக்குள் ஒரு நபருக்கு இரண்டு டோசஸ் (Vaccine doses) போடப்பட்டு நாட்டினை இயல்புநிலைக்குக் கொண்டுவருதல் என்ற இலக்கோடு அமெரிக்கா மற்றும் ஐரோப்பிய நாடுகள் தடுப்பூசித் திட்டத்தினை கையாளுகின்றன. ஆனால் வறிய மற்றும் நடுத்தர வருமானமுள்ள நாடுகள் இயல்புநிலைக்குத் திரும்புவதற்கு 2024 வரை காத்திருக்க வேண்டிவரும் எனக் கணிப்பிடப்படுகிறது. அதன் பொருள் அந்நாடுகளுக்கு தேவையான தடுப்பூசிகள் முழுமையாகப் போய்ச்சேர்வதற்கு இன்னும் 2 ஆண்டுகள் வரை எடுக்கும். குறைந்தது இன்னும் இரண்டு ஆண்டுகளுக்கு அம்மக்கள் தொற்றுக்களுடன் வாழவேண்டும் என்பதாகும். நவம்பர் 2020 நிலவரப்படி, Pfizer-BioNTech மற்றும் Modernas ஆகிய தடுப்பூசிகளின் 2021ம் ஆண்டின் மொத்த உற்பத்தியின் 80 வீதமானவை செல்வந்த நாடுகளுக்கு விற்கப்பட்டுவிட்டன என்பதை செல்வந்த நாடுகளின் துரித கொள்வனவிற்கு உதாரணமாகச் சொல்லலாம்.

மனித மேலாண்மையின் விளைவும் உலகமயமாக்கலும்

உலகளாவிய இந்த பெருந்தொற்று நெருக்கடிக்கான முக்கிய காரணிகளில் ஒன்று உலகமயமாக்கல். இயற்கைக்கு எதிரான மனித மேலாண்மை. தொழில்நுட்பம், பெரும் உற்பத்திகள், பெருநகர அபிவிருத்திகள், போக்குவரத்துகள், வணிகம் என்ற உலகமயமாக்கலின் இன்னபிற கூறுகளை அடுக்கலாம். செல்வந்த நாடுகள் தமது பொருளாதார, படைத்துறை மூலம் தமக்குச் சாதகமான அரசியல் பலத்தையும் அதிகாரத்தையும் கட்டியெழுப்பி வைத்துள்ளன. இந்த அதிகார மற்றும் செல்வாக்குச் செலுத்தல் போக்கின் விளைவுகள் பல. சமகாலத்தில் வெவ்வேறு பிராந்தியங்களில் இடம்பெற்றுவரும் போர்கள் இந்த அதிகாரப் போக்கினது விளைவு.

தடுப்பூசி விடயத்திலேனும் சமத்துவ உணர்வுடன் ஓரளவேனும் பாகுபாடற்ற நீதியான பங்கீடு நடைபெறுமென்ற எதிர்பார்ப்பு சிலமட்டங்களில் இருந்தது. மனிதாபிமான அடிப்படையிலான வேணவா இது என்பது ஒருபுறமிருக்க, உலகளாவிய பொருளாதார ஸ்திரத்தன்மைக்கும் நீதியான தடுப்பூசிப் பங்கீடு அவசியமானதும்கூட என்பது அத்தகு எதிர்பார்ப்பிற்குரிய அடிப்படை. உலகமயமாக்கல் என்பது சாதாரண கண்களுக்குப் புலப்படாத பல்வேறு அடுக்குகளிலான வலைப்பின்னல்களைக் கொண்டுள்ள அமைப்பு முறைமையும் இயங்கு நிலையுமாகும்.

உலகின் பெரும்பாலான நாடுகள் ஏதோவொரு வகையில் ஒன்றுடன் ஒன்று தொடர்புகளைக் கொண்டுள்ளன. ஒன்றில் ஒன்று தங்கியுள்ளன. பொருட்களின் ஏற்றுமதி-இறக்குமதி, நாடுகடந்த பயணங்கள், உற்பத்தி-நுகர்வு என நாடுகளுக்கிடையிலான பொருளாதார மற்றும் மனித உறவுகளும் தொடர்பாடல்களும் பல அடுக்குகளிலாலான வலைப்பின்னல்களைக் கொண்டுள்ளன. இந்நிலையில் உலகின் செல்வந்த நாடுகள் மட்டும் தடுப்பூசிகளைப் போட்டு விடுவதால் தொற்றுப் பரம்பல் கட்டுப்பாட்டுக்குள் வந்துவிடாது. உலக நாடுகள் அனைத்தும் வழமைக்குத் திரும்புவது என்பதே தொற்றுப்பரம்பலைக் கட்டுக்குள் கொண்டுவருவதென்பதன் உள்ளார்ந்த பொருள். அதுவே தொற்றுப்பரம்பலைக் கட்டுப்படுத்துவதில் வினைத்தாக்கம் மிக்க செயற்பாடு. அப்படி நிகழத் தவறினால் நாடுகடந்த பயணங்கள் மீண்டும் மீண்டும் புதியபுதிய தொற்றுஅலைகளைத் தோற்றுவித்துக்கொண்டே இருக்கும். இந்தப் பெருந்தொற்றுக்கூட இன்னமும் உலகின் அதிகார சக்திகளுக்கு எதனையும் கற்றுக்கொடுக்கவில்லை என்பதையே ‘தடுப்பூசி அரசியல்’ அப்பட்டமாக வெளிப்படுத்துகின்றது.

தடுப்பூசி: வறிய நாடுகளுக்கு எட்டாக்கனி?

இந்தப் பாகுபாடான பங்கீடு அதிர்ச்சியளிக்கிறது என்று கூறிய உலக சுகாதார அமைப்பின் பொதுச்செயலர் Teros Adhanom Ghebreyesus, இந்தப்போக்கு பெருந்தொற்றினை அநாவசியமாக நீடிப்பதற்கு வழிகோலும் எனவும் எச்சரித்துள்ளார். ‘ஒரு பெருந்தீயை அணைப்பதற்கான முயற்சியில் தீப்பிழம்புகளின் சில பகுதிகளின் மேல் மட்டும் தண்ணீர் தெளிப்பதற்கு நிகரானது’ என இன்றைய தடுப்பூசிப் பங்கீட்டில் கைக்கொள்ளப்படும் அணுகுமுறையை அவர் சித்தரித்து, உலகளாவிய நீதியான பங்கீட்டினை வலியுறுத்தியுள்ளார்.

இந்த நீதியற்ற அணுகுமுறையைச் சரிசெய்வதற்கும் வறிய மற்றும் நடுத்தர வருமானமுடைய நாடுகளுக்கு தடுப்பூசி பகிரப்படுவதையும் அந்த நாடுகளின் மக்களுக்கு அவை சென்றடைவதைத் துரிதப்படுத்தவும் உறுதிப்படுத்தவும் Covax – (COVID-19 Vaccines Global Access) என்றொரு கூட்டமைப்பு உருவாக்கப்பட்டுள்ளது. உலக சுகாதார அமைப்பு (WHO), மற்றும் தடுப்பூசி – நோய்த்தடுப்பு மருத்துவத்திற்கான உலகக் கூட்டமைப்பு (Global alliance for vaccines and immunization, Gavi) அகியன இந்த அமைப்பினை 2020இல் உருவாக்கியுள்ளன. Gavi அமைப்பின் நோக்கம் பரந்த அளவிலும் விரைவாகவும் தேவை அதிகமுள்ள மூன்றாம் உலக நாடுகளுக்கு தடுப்பூசிகள் சென்றடைவதற்கான ஒருங்கிணைப்புகளை மேற்கொள்வதாகும். இந்த அமைப்பு பல்வேறு தடுப்பூசி தயாரிப்பு நிறுவனங்களுடன் தொடர்புகளைக் கொண்டுள்ளது.

உலகநாடுகளின் கொரோனா தடுப்பூசிவகைகள்

கொரோனாவுக்கு எதிரான உலக நாடுகளின் தடுப்பூசிகள் என்று பார்க்கும் போது V451 எனும் பெயரிலான தடுப்பூசி அவுஸ்ரேலியத் தயாரிப்பாக சந்தைக்கு வந்துள்ளது. இது அவுஸ்ரேலிய Queensland ஆய்வுப் பல்கலைக்கழகமும் (University of Queensland) CSL மருந்து நிறுவனமும் இணைந்து தயாரிக்கின்ற தடுப்பூசி. பிரித்தானிய – சுவீடன் பல்தேசிய மருந்தக மற்றும் உயிரியல் தொழில்நுட்ப நிறுவனமான AstraZeneca அதே பெயரில் கொரோனா தடுப்பூசியினைத் தயாரித்துள்ளது. இந்தியாவின் Serum Institute உலகின் முதலாவது பெரிய தடுப்பூ தயாரிப்பு நிறுவனம். இது மேற்சொன்ன பிரித்தானிய-சுவீடன் நிறுவனத்துடன் இணைந்து கொரோனா எதிர்ப்புத் தடுப்பூசித் தயாரிப்பில் ஈடுபட்டுள்ளது. Moderna, Pfzer, Novavax மற்றும் Inovia ஆகியன ஆகியன அமெரிக்க பல்தேசிய நிறுவனத் தயாரிப்புகள். Curevacs தடுப்பூசி ஜேர்மன் தயாரிப்பு. Sinopharm சீனத் தயாரிப்பாகும்.

Covax கூட்டமைப்பு: நீதியான பங்கீடு அவசியம்

மேற்சொன்ன Covaxகூட்டமைப்பு 2021 இறுதிக்குள் 1,3 பில்லியன் தடுப்பூசிகளை வறிய-நடுத்தர வருமான நாடுகளுக்குச் சேர்ப்பிப்பதை இலக்காகக் கொண்டுள்ளது. ஆனால் அதற்குரிய நிதிவளம் மற்றும் ஒப்பந்தங்களை உறுதிப்படுத்துவதில் அவ்வமைப்பு சவால்களை எதிர்கொண்டுள்ளதாக செய்திகள் வெளியாகியுள்ளன. உலக சுகாதார அமைப்பு  Microsoft நிறுவனர் Bill Gatesஇன் நிதி ஆதரவுடைய இரண்டு இலாபநோக்கற்ற நிறுவனங்களுடன் இணைந்து முதற்கட்டமாக 92 வறிய நாடுகளுக்கான ஒரு பில்லியன் தடுப்பூசிகளை வழங்குவதற்கான பணிகளை முன்னெடுத்துள்ளது. இன்னும் ஒரு பில்லியன் தடுப்பூசிகளை நில நடுத்தர வருமான நாடுகளுக்குப் பெற்றுக் கொடுக்கும் முயற்சியிலும் ஈடுபட்டுள்ளதாகத் தகவல்கள் தெரிவிக்கின்றன.

Gavi-இன் பொறுப்புக்கு உட்பட்ட பணி கொள்வனவு ஒப்பந்தங்களை முன்னெடுப்பது. நாடுகளுக்குரிய பங்கீடுகளை ஒருங்கிணைப்பது. அவற்றைத் தாண்டி, நாடுகளுக்கு அனுப்புவது உட்பட்ட விநியோகச் செயற்பாட்டினை அந்த அமைப்பு கையெடுக்கவில்லை. அதன் குறுகியகால இலக்கு என்பது விலைகுறைந்த மற்றும் அதீத குளிரூட்டியில் வைத்து ஏற்றுமதி செய்யவும் பராமரிக்கவும் தேவையில்லாத தடுப்பூசிவகைகளை கொள்வனவு செய்வதாகும். அதேவேளை அந்த முனைப்புக்கூட சவால்கள் நிறைந்தது. பரிசோதனைகளில் சிக்கல், பக்கவிளைவுகள் பற்றி வெளிவரும் தகவல்கள், பாவனைக்கு ஒப்புதல் அளிக்கப்படுவதில் கேள்விக்குறி போன்ற பல சவால்கள் உள்ளன.

நியாயமற்ற பங்கீடு தொடருமானால்…

தடுப்பூசிப் பகிர்வில் நியாயமற்ற போக்குத் தொடருமானால் மூன்றாம் உலக நாடுகள், தொற்றுத்தடுப்பு நடவடிக்கைகளை நீண்டகாலத்திற்குக் கடைப்பிடிக்க வேண்டிவரும். இது அந்தந்த நாடுகளின் உள்நாட்டுப் பொருளாதாரத்தை மட்டுமல்ல உலகளாவிய பொருளாதாரத்திலும் எதிர்மறையான தாக்கத்தை ஏற்படுத்தக்கூடியன. மூன்றாம் உலக நாடுகளுக்கான தடுப்பூசித் திட்டம் தாமதமாகுமெனில், வைரஸ் இன்னும் பலவடிவங்களில் உருமாறிப் பரவுவதற்கான ஆபத்து அதிகரிக்கும். உருமாறிய வைரஸ்கள் ஏலவே கொரோனாத் தொற்று ஏற்பட்டுக் குணமடைந்தவர்களுக்கு மீண்டும் தொற்றவும்கூடும். அதேவேளை தடுப்பூசி விளைவுத்தாக்கம் குறைந்துபோகவும், தடுப்பூசி எடுத்துக்கொண்டவர்களுக்குத் தொற்றவும் வாய்ப்புண்டு.

வறிய-மற்றும் நடுத்தர வருமானமுடைய நாடுகளில் தொற்று நீடிக்குமெனில் அது கட்டுக்குள் கொண்டு வந்த நாடுகளில் மீண்டும் தொற்றுப்பரம்பலை ஏற்படுத்துகின்ற ஆபத்துகளுக்கும் இட்டுச்செல்லலாம். எனவே இதிலுள்ள செய்தி என்னவெனில் செல்வந்த நாடுகள் வறிய நாடுகளுக்குரிய தடுப்பூசிகளை வழங்குவதென்பது செல்வந்த நாடுகளின் பொருளாதார நலனுக்கும் சாதகமானது.

உலக ரீதியில் 178 நாடுகள் COVAXஉடன் இணைந்துள்ளன. அமெரிக்காவும் ரஸ்யாவும் இணையவில்லை. கனடா, பிரான்ஸ் மற்றும் நோர்வே போன்ற நாடுகள் மேலதிக தடுப்பூசிகளை வறிய நாடுகளுக்குப் பகிர்வதற்கு முன்வந்துள்ளன. தடுப்பூசியைப் பொறுத்தவரை சீனா மூன்றாவது பெரிய உற்பத்தித்திறன் கொண்ட நாடு. தனது தயாரிப்பான Sinopharmஇனை வளர்முக நாடுகளுக்கு விநியோகிப்பதில் அக்கறை கொண்டுள்ளதாகத் தெரிவித்துள்ளது.

இந்நாடுகள் குறைந்தபட்சம் இவ்வாறு அறிவித்துள்ளன. இந்நாடுகளை முன்னுதாரணமாகக் கொண்டு ஏனைய செல்வந்த நாடுகளும் தொடருமானால் மூன்றாம் உலக நாடுகள், 2024 வரை காத்திருக்கவேண்டியதைத் தவிர்க்கலாம் என்ற கருத்து நிலவுகின்றது.

இந்தியா உலகின் மிகப்பெரிய தடுப்பூசித் தயாரிப்பு நாடு. ஆனால் கடந்த மார்ச், ஏப்ரலிலிருந்து அங்கு தொற்றுப்பரம்பல் மிகத்தீவிரமடைந்து வந்துள்ளது. இந்நிலையில் தமது உள்நாட்டு நெருக்கடியைக் கையாள்வதற்கு இந்தியா தடுப்பூசி ஏற்றுமதியை இடைநிறுத்தியுள்ளது. இதனால் Covax மேலும் சவால்களை எதிர்கொள்கின்றது. தாமதமாதலும் பற்றாக்குறையும் மேலும் அதிகரித்துள்ளது.

வறிய நாடுகளின் பொருளாதார, சமூகச் சிதைவு

வறிய நாடுகளின் சமூக முடக்கம் நீடிப்பதென்பது அவற்றின் பொருளாதாரத்தை மட்டுமல்லாது கல்வி மற்றும் சமூக ரீதியான பெரும் பாதிப்புகளுக்கு இட்டுச்செல்லும். உதாரணமாக உகண்டாவில் 1.3 மில்லியன் சிறுவர்கள் கடந்த ஒருவடருடமாகப் பாடசாலைக்குச் செல்லவில்லை. இச்சூழல் சிறுவயதுத் திருமணங்கள், பதின்மவயதுப் பெண்கள் கர்ப்பம் தருக்கும் நிலை, வீடுகளில் வன்முறை அதிகரிப்பு எனப் பல்வேறு சமூக ரீதியான சிதைவுகளுக்கு இட்டுச்செல்கின்றன. பாகிஸ்தான், மலாவி மற்றும் பல நாடுகளிலும் இதனையொத்த சமூக ரீதியிலான சிதைவுகள் பற்றிய தகவல்கள் ஊடகங்களில் வெளிவந்துள்ளன. நேபால் நாட்டில் இளம்பெண்கள் மத்தியில் தற்கொலை 40 வீதத்தினால் அதிகரித்துள்ளது என்றும் கூறப்படுகின்றது.

2020 பின் கோடை காலத்திலிருந்து தடுப்பூசி கொள்வனவு தொடர்பான செய்திகள் வெளிவரத்தொடங்கியதிலிருந்தே செல்வந்த-வறிய நாடுகளுக்கிடையிலான பாரிய இடைவெளி அவதானிக்கப்பட்டது. அப்போதிலிருந்து இன்றுவரை அந்த இடைவெளி அதிகரித்தே வந்துள்ளது. கணிசமான பெருந்தொகைத் தடுப்பூசிகள் தொடர்ந்தும், குறிப்பாக 2021 இறுதிவரை செல்வந்த நாடுகளுக்கே செல்லும் என்கிறார்; ‘உலக சுகாதார புத்தாக்க மையம் – Global Health Innovation Center’ எனும் அமெரிக்காவின் Duke பல்கலைக் கழக ஆய்வு மையத்தைச் சேர்ந்த Andrea Taylor

இடைவெளிகளும் பற்றாக்குறைகளும்

கடந்த டிசம்பர் மாதத்திலிருந்து உலகின் பெரும்பான்மையான பிராந்தியங்களுக்கு தடுப்பூசிகள் கிட்டியுள்ளன. ஆனால் பங்கீட்டு அளவு (கிடைக்கப்பெற்ற எண்ணிக்கை), வளம், மருத்துவ வசதி, தடுப்பூசிகளை உரிய முறையில் பேணுவதற்கான வசதிகள், தொழில்நுட்பம் சார்ந்த பாரிய இடைவெளிகளும் பற்றாக்குறைகளும் நிலவுகின்றன. இந்த வறிய மற்றும் நடுத்தர வருமானமுடைய நாடுகளின் மக்கள் உலகின் மொத்த மக்கட்தொகையில் கிட்டத்தட்ட 75 வீதமானவர்கள். ஆனால் இதுவரை அவர்களுக்கு உறுதிசெய்யப்பட்ட தடுப்பூசியின் அளவு 25 வீதத்திற்கும் குறைந்ததே. செல்வந்த நாடுகள் 2020இன் நடுப்பகுதியிலேயே முந்திக்கொண்டு தடுப்பூசித் தயாரிப்பு நிறுவனங்களுடன் ஒப்பந்தங்களைச் செய்யத்தொடங்கிவிட்டன.

இங்கு மற்றுமொரு விடயம் கவனத்திற்குரியது. தடுப்பூசிக்கான முதலீடுகளை செல்வந்த நாடுகளே செய்தன. அதாவது கொரோனா என்ற இந்தப் புதிய வகை வைரசிற்கான தடுப்பூசிகள் தொடர்பான மருத்துவ ஆய்வுகள், உயிரியல் தொழில்நுட்ப ஆய்வுககள், பரிசோதனைகள், உற்பத்திகளுக்கான முதலீடுகளை செல்வந்த நாடுகளே செய்தன. இந்தத் துரித முதலீடுகள் தான் இன்று வினைத்தாக்கம் மிக்க பல்வேறு தடுப்பூசிவகைகளைக் குறுகிய காலத்திற்குள் கண்டடைய வழிவகுத்துள்ளன என்பதை மறுப்பதற்கில்லை. அதேவேளை பெரும் நிதிமுதலீடு என்பது முன்கூட்டிய கொள்வனவு ஒப்பந்தம், முன்னுரிமையை இந்நாடுகளுக்கு வழங்கியுள்ளன.

தடுப்பூசிக்கான பெருந்தொகை முதலீடுகள்

தடுப்பூசி தயாரிப்புக்கான மருத்துவ ஆய்வு, பரிசோதனை மற்றும் உற்பத்திக்காக பல பில்லியன் டொலர் நிதியினை அமெரிக்கா முதலீடு செய்துள்ளது. ஐந்து வரையான தடுப்பூசிகள் அமெரிக்க முதலீட்டில் கண்டடையப்பட்டுள்ளன. இந்த நிதி முதலீட்டுக்குப் பிரதிபலனாக நிபந்தனைகளையும் அமெரிக்கா விதித்துள்ளது. அதாவது தான் முதலீடு செய்த தடுப்பூசித் தயாரிப்புகளுக்கான முன்னுரிமை தனக்குத் தரப்படவேண்டும் என்பதாகும்.  உலக நாடுகளுக்கிடையிலான இதுவரை தடுப்பூசிப் பங்கீட்டின் ஏற்றத்தாழ்வுகள் தொடர்பாக அமெரிக்கா இதுவரை எவ்வித அக்கறையினையும் காட்டவில்லை. Covaxஇற்கு உதவவும் முன்வரவில்லை. முன்னாள் ஜனாதிபதி ரொனால்ட் டிரம்ப் தடுப்பூசி கையாளலிலும் ஒரு கடும்தேசியவாதப் போக்கிற்குத் தூபமிட்டுச் சென்றுள்ளார் எனப்படுகின்றது.

செல்வந்த நாடுகளின் இலக்கு

அமெரிக்கா உட்பட்ட பல மேற்கு நாடுகள் 2021 கோடைக்கு முன்னர் தமது நாட்டு மக்களுக்கு தடுப்பூசிகளைச் செலுத்தி முடித்து சமூக முடக்கத்திலிருந்து இயல்புக்குத் திரும்புவதை இலக்காகக் கொண்டுள்ளன. ஆனால் அதன் பொருள் அதற்குப் பின்னர் இந்நாடுகள் மேலதிகமாக வைத்திருக்கும் தடுப்பூசிகள் மூன்றாம் உலக நாடுகளுக்குக் சென்றுசேரும் என்பதல்ல. தாம் கொள்வனவு செய்த அல்லது கொள்வனவு ஒப்பந்தம் செய்த தடுப்பூசிகள் வைரசின் அடுத்தடுத்த கட்டங்களுக்காகச் சேமித்து வைப்பதிலேயே செல்வந்த நாடுகள் முனைப்புக் காட்டக்கூடும். அத்தோடு, வைரசின் அடுத்தடுத்த உருமாற்றங்களைக் கருத்திற்கொண்டு புதிய தடுப்பூசிகளை உற்பத்தி செய்வதற்குரிய மருத்துவ ஆய்வுகளுக்கும் தடுப்பூசி உற்பத்திகளில் கவனம் செலுத்தவும் வாய்ப்புகள் உள்ளன.

மருத்துவக் கட்டமைப்புகள் உயர் தரத்தில் உள்ள செல்வந்த நாடுகளே பல்வேறு புறக்காரணிகளினால் தடுப்பூசித் திட்டத்தில் பல்வேறு தாமதங்கள் ஏற்பட்டுள்ளன. இந்நிலையில் மருத்துவக் கட்டமைப்பு பலவீனமாகவும் பற்றாக்குறைகளையும் கொண்டுள்ள நாடுகளில் தடுப்பூசிகள் கிடைத்தாலும் அந்நாடுகளின் உள்ளகச் சூழல்கள் உரிய முறையில் மக்களுக்குச் சென்றடைவதில் சிக்கல்கள் உள்ளன. நோர்வே போன்ற நாடுகளிற்கூட இன்றும் தடுப்பூசி தொடர்பான பிரதேசங்களுக்கான பங்கீடு, முன்னுரிமை அதாவது எந்தப் பிரதேசங்களுக்கு முன்னுரிமை கொடுப்பது போன்ற விவாதங்கள் ஊடகங்களில் இடம்பெற்றுவருகின்றன.

தவிர மேற்குநாடுகள் பலவற்றில் Astrazeneca தடுப்பூசியின் பக்கவிளைவுகள் தொடர்பாக எழுந்த அச்சங்கள், அவற்றின் தடுப்பூசித்திட்டத்தில் தாமதத்தை ஏற்படுத்தியிருந்தன. Astrazeneca தடுப்பூசி இரத்தக்கசிவு உட்பட்ட சில பக்கவிளைவுகளை ஏற்படுத்தியுள்ளது. சிலர் இறந்துமுள்ளனர். இந்தப் பின்னணியில் ஐரோப்பிய நாடுகள் பல Astrazeneca தடுப்பூசியை இடைநிறுத்தியிருந்தன. அதன் பக்கவிளைவுகள் மிகச் சிறிய அளவிலானவை என்று மருத்துவ ஆய்வுகள் உறுதிப்படுத்தியதை அடுத்து பல நாடுகள் மீண்டும் அதனைப் பயன்பாட்டுக்குக் கொண்டுவந்துள்ளன. நோர்வே, டென்மார்க் போன்றன அதனை முற்றுமுழுதாக நிறுத்தியுள்ளன. Astrazenecaவின் பக்கவிளைவுகள் தொடர்பாக வெளிவந்த செய்திகளும் முன்னெடுக்கப்பட்ட விவாதங்களும் அதன் மீதான நம்பிக்கையை மக்கள் மத்தியில் பொதுவாக இழக்கச் செய்துள்ளன.

புதிய சவால்கள் பற்றிய அச்சம்

2021 இறுதியில் அல்லது, குறுகிய காலத்திற்குள் புதிய சவால்கள் உருவாகலாம் என்ற அச்சமும் உலகளவில் நிலவுகின்றது. தடுப்பூசிகளின் எதிர்ப்புசக்தியின் தொழிற்பாட்டுக்காலம் எவ்வளவு என்பது இதுவரை உறுதிப்படுத்தப்படவில்லை. நீண்ட கால எதிர்ப்புசக்தியை ஏற்படுத்துவதற்கு இரண்டுக்கு மேற்பட்ட தடவைகள் தடுப்பூசியை ஒரு நபருக்குச் செலுத்த வேண்டி வருமா என்பதும் அறியப்படவில்லை.  வழமையான இன்புளுவன்சா காய்ச்சலுக்கு (Seasonal influenza) எதிரான தடுப்பூசி போல வருடாவருடம் கொரோனா எதிர்ப்புத் தடுப்பூசி செலுத்த வேண்டிய நிலை ஏற்படக்கூடும் என்ற கருத்துகளும் நிலவுகின்றன. மேற்படி சூழல் ஏற்படுமாயின் செல்வந்த நாடுகள் இன்னும் பன்மடங்கு தடுப்பூசிகளைத் தம்வசப்படுத்திக் கொள்வதிலேயே முனைப்புக் காட்டப்போகின்றன. வறிய நாடுகளின் நிலை இன்னும் மோசமான நிலைக்கு இட்டுச் செல்லப்படும்.

உற்பத்திக்குரிய மருத்துவ அறிவியல் மற்றும் உயிரியல் தொழில்நுட்ப வளங்களும் மனித வளங்களும் அமெரிக்கா உட்பட்ட மேற்கிடம் அதிகம் உள்ளன. ஆபிரிக்க, தென்.அமெரிக்க, தென் கிழக்கு ஆசிய நாடுகளில் இத்தகைய மருத்துவ அறிவியல் வளங்கள் பெரும்பற்றாக்குறையாக உள்ளன. இந்தப் பிராந்தியங்களுடன் ஒரு உற்பத்தி இணைப்பு மையங்கள் உருவாக்கப்படவேண்டுமென ‘உலக சுகாதார புத்தாக்க மையத்தின்’ ஆய்வு பரிந்துரை செய்துள்ளது. இந்தப் பரிந்துரை நடைமுறைப்படுத்தப்படுவதற்கு அதிக காலம் எடுக்கும். அது குறுகிய எதிரகாலத்தில் சாத்தியமில்லை. இந்த விடயத்தினை இந்தியாவும் தென் ஆபிரிக்காவும் உலக சுகாதார அமைப்பின் கவனத்திற்குக் கொண்டுவந்துள்ளன என்றும் கூறப்படுகின்றது.

தடுப்பூசிகளின் நியாயமான பங்கீடு அவசியம்

செல்வந்த நாடுகள் ஒருவகைப் பதுக்கலை மேற்கொள்கின்றன. அந்தப் போக்கினைத் தவிர்த்து வறிய மற்றும் நடுத்தர வருமானமுடைய நாடுகளுடன் தடுப்பூசிகளைப் பகிர்ந்து கொள்ளுமாறு உலக சுகாதார அமைப்பு, சர்வதேச மன்னிப்புச் சபை போன்றக அழுத்தமான கோரிக்கைகளை முன்வைத்துள்ளன. ‘எயிட்ஸ் பெருந்தொற்றின் போது, செல்வந்தர்கள் மருத்துவச் சிகிச்சை பெற்றதையும் அதேவேளை வளம் குறைந்த நாடுகளில் மில்லியன் கணக்கான மக்கள் இறக்க நேரிட்டதைக் கண்டிருக்கின்றோம். அதே தவறு மீண்டும் நிகழ்வதை நாம் அனுமதிக்கக்கூடாது’ என்று எச்.ஐ.வி மற்றும் எயிட்ஸ் தொடர்பான ஐ.நா திட்டத்தின் (UNAIDS) நிர்வாக இயக்குனர் Winnie Byanyima தெரிவித்துள்ளமை குறிப்பிடத்தக்கது.

மருந்துதயாரிப்பு நிறுவனங்களுடன் பெரிய இருதரப்பு ஒப்பந்தங்களை நேரடியாகச் செய்ததைத் தவிர்க்குமாறும், அனைத்து நாடுகளுக்குமான நீதியான பங்கீட்டினை உறுதிப்படுத்துவதற்கான உலகளாவிய செயல்முன்னெடுப்புகளுக்கு ஆதரவு வழங்குமாறு செல்வந்த நாடுகளை சர்வதேச மன்னிப்புச் சபை கோரியுள்ளது. அத்தோடு மருந்துப்பொருட்களைத் தயாரிக்கும் பெருநிறுவனங்கள் தமது காப்புரிமைக்கு அல்லாது மனிதஉயிர்களுக்கு முன்னுரிமை கொடுக்க வேண்டுமெனவும் கோரியுள்ளது.

காப்புரிமையில் விதிவிலக்குக் கோரல்

புதிய மருந்துப்பொருட்கள் உட்பட்ட தடுப்பூசிகள் தயாரிக்கும் போது தயாரிப்பு நிறுவனங்கள் அதற்குரிய காப்புரிமையைத் (தனியுரிமை) தமதாக்கிக்கொள்கின்றன. அதன் அர்த்தம் குறிப்பிட்ட அந்த நிறுவனம் மட்டுமே, குறிப்பிட்ட காலத்திற்கு குறித்த அந்தப் பொருளை உற்பத்தி செய்கின்ற சட்ட ரீதியான உத்தரவாதத்தைப் பெறுகின்றது என்பதாகும். மட்டுமல்லாமல் அதற்குரிய விலையையும் நிர்ணயிக்கும் உரிமையைப் பெறுகின்றது, செய்முறை தொடர்பான தகவல்களையும் அந்நிறுவனம் இரகசியமாகப் பேணுவது காப்புரிமை சார்ந்த நடைமுறை.  கொரோனா தடுப்பூசி உலகளாவிய மக்களுக்குச் சென்றடைவதை உறுதி செய்யும் பொருட்டு, காப்புரிமை தொடர்பான விதிமுறைகளில் விதிவிலக்குகளைத் தடுப்பூசி உற்பத்தி நிறுவனங்கள் செய்ய முன்வர வேண்டும். அதன் மூலம் ஏனைய நாடுகள் தமக்கான தடுப்பூசியைத் தயாரிப்பதற்குரிய தகவல்களைப் பெறுவதற்கு ஆவண செய்ய வேண்டும் என்பதே மன்னிப்புச் சபையின் கோரிக்கைக்கான அடிப்படை.

அத்தகைய காப்புரிமை விதிவிலக்கினை உலக சுகாதார அமைப்பின் ஊடானதொரு தீர்மானத்தின் மூலம் நடைமுறைக்குக் கொண்டுவரமுடியும். ஆனால் செல்வந்த நாடுகள் பல இதுவரை அத்தகைய தீர்மானத்தை எதிர்த்து வந்துள்ளன. தடுப்பூசி ஆய்வு, தயாரிப்பு, பரிசோதனை, பாவனைக்கான ஒப்புதல் பொறிமுறைகள் பெரும் நிதியைக் கோருகின்ற செயல். தகவல்களை நாடுகளுடன் பரிமாறுவது தடுப்பூசித் தயாரிப்பு நிறுவனங்களுக்கு பெரும் நட்டத்தை ஏற்படுத்திவிடும் என்பது எதிர்ப்பிற்கான காரணமாக முன்வைக்கப்படுகின்றது.

உலகளாவிய தலைமைத்துவமின்மை

கென்யா, மியான்மார், நைஜீரியா, பாகிஸ்தான், உக்ரைன் உட்பட்ட 67 நாடுகளில் மொத்தமாக ஒன்றரை மில்லியன் மக்களுக்கு கொரோனாத் தொற்று ஏற்பட்டிருப்பதான தரவுகள் வெளிவந்திருந்தது. ஆனால் தற்போதைய தடுப்பூசி அணுகுமுறை இதேகதியில் தொடருமானால் இந்நாடுகளின் பத்து வீதமான மக்களுக்கு மட்டுமே தடுப்பூசிகள் கிடைக்கும் எனப்படுகிறது. உலக சுகாதார அமைப்பின் கணிப்பீட்டின்படி உலகளாவிய ‘கூட்டு எதிர்ப்புசக்தியை (Community immunity)’ அடைவதற்கு எழுபது வீதமான உலக மக்களுக்கு தடுப்பூசிகள் போடப்பட வேண்டும்.

தடுப்பூசித் திட்டத்தினை நியாயமான முறையில் முன்னெடுப்பதற்குரிய உலகளாவிய தலைமைத்துவம் தற்போதைய சூழலில் இல்லை என்பதே யதார்த்தம். வலியவன் வாழ்வான் என்ற அணுகுமுறையைத்தான் பெரும்பாலான சக்திமிக்க நாடுகள் கடைபிடிக்கின்றன. இந்த நிலைமைகளைச் சீர்செய்வதற்கான நம்பிக்கை மிக்க அமைப்புகளாக உலக சுகாதார அமைப்பும், அது உருவாக்கிய Covax ஒருங்கிணைப்புத் திட்டமும் மட்டுமே கண்ணுக்குத் தெரிகின்றன. அத்தோடு சர்வதேச மன்னிப்புச் சபை போன்ற உலகளாவிய அழுத்தக்குழுக்களும் நீதியான தடுப்பூசிப் பங்கீடடின் அவசியத்தினை வலியுறுத்தி வருகின்றன.

***

ரூபன் சிவராஜா

தொடர்ந்து அரசியல் கட்டுரைகளை எழுதி வரும் இவர் கட்டுரைகள் போக கவிதை, பாடல்களும் எழுதி வருகிறார். வசிப்பது நார்வேயில். இவரது முதல் நூல் – அதிகார நலனும் அரசியல் நகர்வும் அண்மையில் வெளியானது. தொடர்புக்கு – svrooban@gmail.com

நாராயணி சுப்ரமணியன்

தகவல்கள் அடைக்கப்பட்ட கண்ணாடிப் போத்தல்கள் கரையொதுங்குவதும், அதையொட்டிய தேடலில் தொடங்கும் பயணம் காதலில் முடிவதாகவும் பல புனைவுகள் எழுதப்பட்டிருக்கின்றன. எங்கிருந்தோ வீசியெறியப்பட்ட கண்ணாடி பாட்டிலை கரைசேர்ப்பதில் கடல் அலைகளுக்கு மட்டுமல்ல, கடல் நீரோட்டங்களுக்கும் (Ocean currents) பெரும் பங்கு உண்டு. “உள்நாட்டுக் கடல் எல்லைகளில் பிடிக்கப்படுகிற மீன்களில் 90 விழுக்காடு வேறு ஒரு நாட்டிலிருந்து இங்கு வலசை வந்தவை தான்” என்று சமீபத்திய ஒரு ஆய்வில் நிரூபிக்கப்பட்டிருக்கிறது. இந்த மீன்களின் பயணத்திற்கு நீரோட்டங்களும் துணைபுரிகின்றன. 

கடல் உயிரினங்களின் வலசைப்பாதையை நிர்ணயிப்பதில் கடல் நீரோட்டங்கள் பெரும்பங்கு வகிக்கின்றன. அதிகமாக நீந்தாத பவள உயிரிகள், கடற்குதிரைகளின் உலகளாவியப் பரவலுக்குக் கடல் நீரோட்டங்களே காரணம். ஃபைண்டிங் நீமோ திரைப்படத்தில், “இங்கிருந்து நீ நகரத்தை நோக்கி செல்லவேண்டுமானால் கிழக்கு ஆஸ்திரேலிய நீரோட்டத்தை (East Australian Current) முதலில் கண்டுபிடித்து அதில் பயணிக்க வேண்டும்” என்று ஒரு வசனம் வரும். கடலாமைகள் தங்கள் வலசையின் போது இந்த நீரோட்டத்தை ஒரு நெடுஞ்சாலை போல பாவித்துப் பயணிப்பதையும் அழகாகக் காட்சிப்படுத்தியிருப்பார்கள்.

கடலின் அடுக்குகள்

கடலின் மேற்பரப்பு, அடியாழம், இரண்டுக்கும் நடுவிலான இடைப்பகுதி என்று செங்குத்தாகக் கடலை மூன்றாகப் பிரிக்கலாம். மேற்பரப்பு தொடர்ந்து காற்று, சூரிய ஒளி ஆகியவற்றோடு ஒரு உரையாடலை நிகழ்த்திக்கொண்டே இருக்கிறது. காற்றால் ஏற்படும் சலனம், சூரிய ஒளியால் ஏற்படும் வெப்ப மாற்றம், ஆவியாதல், உப்புத்தன்மை மாற்றம் ஆகியவை மேற்பரப்பைத் தொடர்ந்து அலைகழிக்கின்றன. மேற்பரப்பின் ஆக்சிஜன் அளவு, வெப்பம், உப்புத்தன்மை ஆகியவை மாறிக்கொண்டேயிருக்கும். கடலின் மேற்பரப்பிலிருந்து கிட்டத்தட்ட 100 மீட்டர் ஆழம் வரை இந்தப் பகுதி நீடிக்கும். வெளியிலிருந்து வரும் வெப்பத்தை எல்லாம் இந்தப் பகுதிதான் முதலில் உள்வாங்குகிறது. குறிப்பாக, நாம் வெளியிடும் கரிம உமிழ்வுகளையும் பசுங்குடில் வாயுக்களின் வெப்பத்தையும் இதுதான் உள்வாங்குகிறது.

ஆழத்தைப் பொறுத்தவரை, வெளியிலிருந்து வரும் மாற்றங்கள் குறைவு. இங்கு பொதுவாக உயிர்ச்சத்துக்கள் அதிகம், வெப்பநிலை குறைவு.

இரண்டிற்கும் நடுவில் உள்ள இடைப்பகுதியில் திடீரென்று வெப்பநிலை இறங்கும். இது Thermocline என்று அழைக்கப்படுகிறது. ஒரு இடத்தில் திடீரென்று அடர்த்தியும் மாறுபடும். இது pycnocline என்று அழைக்கப்படுகிறது.

ஆழத்தில் இருக்கும் வெப்பம் குறைந்த, உயிர்ச்சத்து நிறைந்த நீர் மேற்பரப்புக்கு வரவேண்டும். மேற்பரப்பில் உள்வாங்கப்பட்ட வெப்பம் ஆழத்துக்குக் கடத்தப்பட வேண்டும். இது நிகழாவிட்டால், உயிர்கள் கடலில் வாழ முடியாது.

கடல்வழிச்சாலை

மேற்பரப்பில் இருக்கிற நீர் காற்றால் உந்தித் தள்ளப்பட்டு, நீரோட்டமாக மாறுகிறது. அது மேற்பரப்பு நீரோட்டத்தை (Surface current) என்று அழைக்கப்படுகிறது.

ஆழத்திலிருந்து கிளம்புகிற நீரோட்டத்தின் (Deep current) தொடக்கம் சற்றே வித்தியாசமானது. பூமத்திய ரேகையை (நில நடுக்கோடு Equator) ஒட்டிய பகுதிகளில் வெப்பம் அதிகம் என்பது நாம் அறிந்தது தான்.

அதைப்போலவே துருவப்பகுதிகளின் கடல்நீர் குளிர்ச்சியானது. புவியின் மத்தியப் பகுதிகளிலிருந்து வெப்பத்துடன் துருவப்பகுதிகளை நோக்கிப் பயணிக்கும் நீர் அங்கு போனதும் குளிர்ந்து விடுகிறது. குளிர்நீருக்கு அடர்த்தி அதிகம் என்பதால் அது ஆழத்துக்குப் பயணிக்கிறது. இந்தப் பயணம் ஆழத்திலிருக்கும் நீரை உந்தித்தள்ளி நீரோட்டமாக மாற்றுகிறது. ஆழ நீரோட்டம் என்பது வெப்பநிலை, உப்புத்தன்மை, அடர்த்தி ஆகியவை மாறுவதால் ஏற்படுகிறது.

ஒவ்வொரு இடத்திலும் கடற்படுகையின் அமைப்பு, நிலப்பரப்பு, ஓதங்களின் தன்மை, பருவகால மாறுபாடுகள் எல்லாமே இந்த இருவகை நீரோட்டங்களின் மீதும் ஆதிக்கம் செலுத்துகின்றன. இந்த இரு நீரோட்டங்களும் இணையும்போது உலகளாவிய கன்வேயர் பெல்ட் (Global Conveyor Belt) ஒன்று உருவாகிறது. உலகக் கடல்கள் எல்லாவற்றுக்குள்ளாகவும் ஊர்ந்து செல்லும் பிரம்மாண்டமான நீர்வழிச்சலையாக நாம் இதைக் கற்பனை செய்துகொள்ளலாம். விமான நிலையங்களில் நாம் பார்க்கும் கன்வேயர் பெல்ட்டைப் போலவே வெப்பத்தையும் உயிர்ச்சத்துக்களையும் ஒரு இடத்திலிருந்து இன்னொரு இடத்துக்கு இது கொண்டு செல்கிறது. மேற்பரப்பிலிருந்து வெப்பநீரை ஆழத்துக்குக் கொண்டு செல்வது, ஆழத்திலிருக்கும் உயிர்ச்சத்துக்களை மேற்பரப்புக்குக் கொண்டுவருவது என்று கடலின் செங்குத்து அடுக்குகளிலும் இது ஆதிக்கம் செலுத்துகிறது.

நிலையான கடல்

சூழலியலைப் பொறுத்தவரை, “நிலையான”, “சீரான” போன்ற சொற்கள் மகிழ்ச்சியளிக்கக் கூடியவை. ஆனால் செப்டம்பர் 2020-ல் உலகின் பெருங்கடல்கள் நிலையானவையாக மாறிக்கொண்டிருக்கின்றன என்று ஒரு ஆய்வுக்கட்டுரை வெளியானபோது அறிவுலகம் கவலையில் ஆழ்ந்தது.

கடந்த ஐம்பது ஆண்டுகளாக கடலின் நிலையற்ற தன்மை குறைந்து, கடல் அடுக்குகள் ஆறு மடங்கு நிலையானவையாக மாறியிருக்கின்றன. கடலின் அடுக்குகளுக்கிடையில் நீர்பரிமாற்றம் குறைந்திருக்கிறது. குறிப்பாக பரப்புக்கும் ஆழத்துக்கும் நடுவில் இருக்கும் pycnocline பகுதி திடமானதாக மாறி, மேலிருந்து கீழும் கீழிருந்து மேலாகவும் நீர் பயணிப்பதைத் தடுக்க ஆரம்பித்திருக்கிறது. புவி வெப்பமடைதலுக்குக் காரணமான பசுங்குடில் வாயுக்கள் அதிகரித்திருப்பதால், மேற்பரப்பில் அதிகமான வெப்பம் வந்து சேர்கிறது. அது மேற்பரப்பிலேயே தங்கிவிடுகிறது. கீழிருந்து உயிர்ச்சத்துக்கள் மேலே வர முடியாததால், மேற்பரப்பில் விலங்குகளுக்கு உணவு கிடைப்பதில்லை.

“இது மிகவும் கவலையளிக்கிற. மோசமான செய்தி” என்கிறார் இந்த ஆய்வை நடத்திய மைக்கேல் மான். காலப்போக்கில் கூடுதலான கரிம உமிழ்வுகள் வரும்போது, கடலால் அவற்றை உள்வாங்க முடியாமலேயே போகலாம். அப்போது எல்லா உமிழ்வுகளும் வளிமண்டலத்திலேயே தங்கி புவியின் வெப்பநிலையை இன்னும் அதிகரிக்கும்.

ஊர்ந்து செல்லும் அட்லாண்டிக் நீரோட்டம்

அட்லாண்டிக் நீரோட்டங்களில் முக்கியமானதாகக் கருதப்படுவது Atlantic Meridional Overturning Circulation (AMOC) என்கிற நீரோட்டம். அட்லாண்டிக் கடலில் மட்டுமல்லாமல், உலகின் பல கடற்பகுதிகளின் வெப்பத்தையும் உயிர்ச்சத்துக்களின் விகிதத்தையும் நிர்ணயிப்பது இந்த ஒரு நீரோட்டம்தான். இன்னும் சொல்லப்போனால் இந்தியப் பெருங்கடலின் நீரோட்டத்துக்கும் இதற்கும்கூட நெருங்கிய தொடர்பு உண்டு. பிப்ரவரி 2021-ல் வெளியான ஒரு ஆய்வு ஒரு கவலையான செய்தியை முன்வைத்தது. கடந்த 1600 வருடங்களின் தரவுகளோடு ஒப்பிடும்போது இந்த நீரோட்டத்தின் வேகம் குறைந்துவிட்டது என்று ஆய்வில் உறுதி செய்திருக்கிறார்கள்.

இதைப் படிக்கும்போது பலருக்கு  Day after tomorrow திரைப்படம் நினைவுக்கு வரலாம். இந்த AMOC நீரோட்டம் திடீரென்று வேகம் இழந்து, ஒரு கட்டத்தில் முற்றிலும் நின்றுவிடுவதாகவும், அதனால் ஐரோப்பாவிலும் அமெரிக்காவிலும் பேரிடர்கள் ஏற்படுவதாகவும் காட்டியிருப்பார்கள்.  விண்ணிலிருந்து விழும் ஹெலிகாப்டர்களையும் நியூயார்க் நகரம் நீரால் விழுங்கப்படுவதையும் மிகப்பெரிய புயல்களின் சீற்றத்தையும் திரைப்படம் பார்த்தவர்களால் எளிதில் மறந்துவிட முடியாது.

திரைப்படத்தில் காட்டியதன் அடிப்படை அறிவியல் சரிதான் என்றபோதும், அது ஏற்படுத்தப்போகும் தாக்கங்களைப் பற்றி அறிவியலாளர்களிடையே மாறுபட்ட கருத்துக்கள் நிலவுகின்றன. திடீரென்று AMOC ப்ரேக் போட்டதுபோல் நின்றுவிடாது, ஆனால் அது தொடர்ந்து வேகம் இழந்துவருகிறது. 1950-களோடு ஒப்பிடும்போதே வேகம் 15% குறைந்துவிட்டது என்பது விஞ்ஞானிகளின் கருத்து. 2100-க்குள் வேகம் 45% வரை குறையலாம் என்றும், 2300-க்குள் அந்த நீரோட்டமே அழிந்து ஓட்டம் நின்றுவிடலாம் என்றும் கணிக்கப்பட்டுள்ளது. காலநிலை மாற்றத்தால் பனிப்பாறைகள் உருகுவதால் இந்த வேகமிழப்பு ஏற்பட்டிருக்கிறது.

இதன் விளைவுகள் ஆங்காங்கே ஏற்கனவே தெரிய ஆரம்பித்துவிட்டன. இந்த நீரோட்டம் வலுவிழப்பதால் கடலின் மேற்பரப்பு வெப்பநிலை மாறியிருக்கிறது. அதனால் அட்லாண்டிக் தீவுகளில் கோடைக்காலங்களில் சராசரி வெப்பநிலை அதிகரித்திருக்கிறது.

பருவகாலத்துக்கேற்ப இனப்பெருக்கம் செய்யும் பறவைகளான பஃபின்கள் (puffins) தாமதமாக முட்டையிடுகின்றன. காலம் தப்பி வெளிவரும் குஞ்சுகள் எடை குறைந்து காணப்படுகின்றன. அவற்றுக்கு உணவும் சரிவரக் கிடைப்பதில்லை. இது ஒரு உதாரணம்தான். இன்னும் எத்தனையோ சூழல் சமநிலைகள் தடுமாறத் தொடங்கியிருக்கின்றன.

நீர்வழிச்சாலையை நம்பியிருக்கும் கடல் உயிரிகள்

ஒருபுறம் அட்லாண்டிக் நீரோட்டங்கள் வேகமிழந்து வருகின்றன என்றால், இன்னொரு புறம் வெப்பமண்டல நீரோட்டங்களின் வேகம் கூடியிருக்கிறது. இது எந்த மாதிரியான விளைவுகளை ஏற்படுத்தப்போகிறது என்பது தெரியவில்லை. ஒரு சிறுமாற்றம் நிகழ்ந்தாலே உலகளாவிய கன்வேயர் பெல்ட் நிலைதடுமாறிவிடும். ஏற்கனவே சொன்னதுபோல் பல்வேறு இயற்கைக் கூறுகளால் உந்தப்படுகிற பிரம்மாண்டமான சுழற்சி இது. எந்தச் சிறுமாற்றம் இதைப் புரட்டிப்போடும் என்பது இன்னும் அறிவியலுக்கு எட்டாததாகவே இருக்கிறது.

தொழில்நுட்பங்கள் வளர்ந்துவிட்ட இந்தக் காலத்திலும் நாம் இந்த சுழற்சியின் நுணுக்கங்களை இன்னும் புரிந்துகொள்ளவில்லை என்பதே உண்மை. 1992-ல் மேற்கு பசிபிக் கடலில் ஒரு மிகப்பெரிய சரக்குக் கப்பல் கவிழ்ந்தது. கப்பலில் குளியல் தொட்டியில் அழகுக்காக மிதக்கவிடப்படுகிற ரப்பராலான 28,800 மஞ்சள் வாத்துகள் இருந்தன. நீரோட்டங்களால் அவை அங்குமிங்கும் பயணிக்கத் தொடங்கின. அவற்றைக் கண்காணிப்பதன் மூலம் விஞ்ஞானிகள் உலகளாவிய கன்வேயர் பெல்ட்டைப் புரிந்துகொள்ள முயற்சி செய்து வருகிறார்கள்!

2021-ல் வெளிவந்த ஒரு ஆய்வில் கடலின் மேற்பரப்புக்கும் ஆழத்துக்கும் இடைப்பட்ட பகுதி சூழலியல் ரீதியாக மிகவும் முக்கியமானது என்பதை உறுதிசெய்தது. ஒரு கடற்பகுதியில் மட்டுமே ஆராய்ந்ததில் இந்த இடைப்பட்ட பகுதியில் 112 வகையான மீன் லார்வாக்கள் கண்டுபிடிக்கப்பட்டன! முட்டையிலிருந்து வெளிவரும் மீன்குஞ்சுகளுக்கு உணவும் பாதுகாப்பும் கிடைப்பது இந்த இடத்தில்தான் என்று அந்த ஆய்வு தெரிவிக்கிறது. இதிலிருந்து நீரோட்டங்களுக்குள் நுழைகிற வளர்ந்த மீன் குஞ்சுகள் தாங்கள் இருக்கப்போகிற நிரந்தர வாழிடத்தைச் சென்று சேர்கின்றன.

உலகளாவிய கன்வேயர் பெல்ட் என்பது பல சிறு நீர்வழிச்சாலைகளை இணைக்கிற உயிர்ச்சத்துக்களின் பெரும்பாதை எனலாம். கடலோரப் பகுதிகளின் பருவநிலை, மீன்பிடித்தலுக்கு உகந்த இடங்கள், எல் நினோ நிகழ்வுகள், வெப்ப சமநிலை என்று பல்வேறு கூறுகளில் இதன் தாக்கம் உண்டு. சிற்றூரில் இருக்கிற மக்கள் நடந்து மெயின்ரோட்டுக்கு வருவதைப் போல இந்த கடல்வழிச்சாலைக்கு வந்தால்தான் வலசை உயிரிகள் தங்கள் பயணத்தைத் தொடங்க முடியும். திமிங்கலங்களின் வாழ்வில் இந்தப் பாதைகளின் முக்கியத்துவம் அளப்பரியது. வலசை மீன்களின் இனப்பெருக்கத்தையும் உணவுக்கான கூடுகைகளையும் இந்தப் பாதைகளே தீர்மானிக்கின்றன.

நீரோட்டங்கள் சரியாக இருந்தால் என்ன நன்மை என்பதைவிட, இவை தடுமாறினால் என்னவாகும் என்பது நமக்கு இன்னும் சரியாகத் தெரியவில்லை. அது ஒரு பெரிய சவால்.

பயணியரின் பைகளை ஒழுங்காக எடுத்து வந்துகொண்டிருந்த கன்வேயர் பெல்ட் ஒன்று திடீரென்று வேகமெடுத்தாலோ காலவரையின்றி நின்றுவிட்டாலோ என்னவாகும் என்பதை நினைத்துப் பார்க்கிறேன். மீன்களாலும் திமிங்கலங்களாலும் மேலாளரிடம் போய் நுகர்வோர் உரிமை பற்றி உரக்கப்பேசி சண்டையிட முடியுமா?!

*

தரவுகள்

Ramesh N et al, The small world of global marine fisheries: The cross-boundary consequences of larval dispersal, Science, 2019.

Guancheng et al, Increasing ocean stratification over the past half century, Nature Climate Change, 2020.

Ceaser et al, Current Atlantic Meridional Overturning Circulation weakest in Last millenium, Nature Geoscience, 2021.

Whitney et al, Surface slick are pelagic nurseries for diverse ocean fauna, Scientific Report, 2021.

***

நாராயணி சுப்ரமணியன்:கடல்வாழ் உயிரியலில் முனைவர் பட்டம் பெற்றவர்.”நிற்பதுவே நடப்பதுவே பறப்பதுவே” என்ற உயிரியல் நூலை எழுதியுள்ளார். தமிழில் கடல்சார், அறிவியல் பொருண்மைகளைக் கவிதைகளில் எழுதி வருபவர். விகடன் தடம், வாசகசாலை, அரூ இதழ்களில் இவரது கவிதைகள் வெளியாகியுள்ளன. Email: nans.mythila@gmail.com

குறுங்கதை

பானி

கத்திரி வெயில் நெருப்பாய் எரியும் நகரத்தில், வறண்ட நாக்குடன் அலைகிறான் அப்துல் சலாம். நகரமே பூட்டிக் கிடக்கிறது. எங்கும் ஒரு துளி ஈரமில்லை. உயிர்போகும் தாகத்தோடு கடற்கரைக்குச் சென்றான். அங்கே கடலும் பூட்டப்பட்டிருந்தது. சுடும் பாறையாய்த் தகிக்கும் உடல். வெப்பக் காற்றாய் நடனமிடும் உடை. பசியில் தாகத்தில் எரிகுழம்பாய் கண்ணீர் வெடிக்க, மீண்டும் பூட்டிய நகரத்திற்குத் திரும்பினான். வீடுகளின் துளைவழி தாகம் தாகம் என்கிற கதறல். தொற்று அபாயத்தில் துளைகளும் அடைக்கப்படுகின்றன. ஐம்பது பேர் கொண்ட மரண ஊர்வலத்தில் தாகம் தாகம் என்றான். பறையோசையில் நகரம் அதிர ஆடிச்செல்லும் கூட்டத்தில் ஒரே ஒரு தும்மலோசை கேட்க, பாடையை அங்கேயே போட்டுவிட்டுத் தெறித்து ஓடினார்கள். ஏதொன்றும் அறியாத சலாம் காளி கோயிலுக்குள் ஓடி ஒளிந்தான். அங்கே நீர் சொட்டும் சத்தம். தேடிச் சென்று மிடறு மிடறாய்ப் பருகினான். சுடும் உடலில் இருந்து ஆவி பறந்தது. வானில் பறந்த ஆவி கண்டு காந்தி ராமன் பதறி ஓடிவந்தான். நீ யார் உன் பெயர் என்ன, உன் அப்பா பெயர் என்ன என்று விசாரித்தான். என் பெயர் அப்துல் சலாம், அப்பா பெயர் ரஹீம். “எங்களின் வாழ்வை அழிக்க அரேபியாவில் இருந்து வந்தவனே” என்ற வார்த்தைகள் சலாமின் கைகளைத் திருகி முதுகில் குத்தின. நிலையிழந்து வீழ்ந்த சலாமின் வயிற்றிலும் நெஞ்சிலும் ஓங்கி ஓங்கி உதைத்தான் காந்தி ராமன். மீண்டும் மீண்டும் அடித்ததில் கிழிந்து தொங்கியது சலாமின் உடை. அவன் கடைவாயில் இருந்து ரத்தம் சொட்டும் சத்தம். மிடறு மிடறாய்க் குடித்தான் காந்தி ராமன். பின் காளியின் நிழலில் இளைப்பாறிய காந்தி ராமனின் வாயின் மீது ஒற்றைக் காலை வானில் செருகிய மிருகம் சிறுநீர் பெய்து சென்றது. 

***

கவிதை

மண்டையோட்டின் முகக் கவசங்கள்

1

எந்த நூற்றாண்டில் பற்றவைத்த நெருப்பு இன்னும் எரிக்கிறது சேரியை. ஊருக்குள் இருந்தபடியே ஊதாங்குழலால் அணைந்த நெருப்பை ஊதிக்கொண்டிருப்பது யார். பசியுற்ற கண்ணனுக்கு மாட்டின் முட்டி எலும்பின் குழம்பைச் சற்று முன்புதான் தட்டிக் கொடுத்தேன். எரிந்தபடியே இடைவிடாது பாடும் புல்லாங்குழலையாவது காப்பாற்றுங்கள். இது விருந்தாளியின் தலைமுறைக்குக் கைம்மாறு அல்லவா.

மண்புழுவைக் குத்தும் கடப்பாரை, நத்தையின் முதுகில் தீப்பந்தம், பட்டாம் பூச்சிச் சிறகுகளில் உருட்டுக்கட்டை, பஞ்சாரத்தின் ஓட்டையில் பெட்ரோல் குண்டு. தப்பித்து ஓடும் சுருங்கிய தோலை சம்மட்டியால் அடிக்கும் வாலிபன் உடைந்த கட்டிலின் கால்களைப் பொறுக்கிப் பத்திரப்படுத்துகிறான். நெளிந்த பீரோவுக்குள் இருந்த மினுமினுப்பை அள்ளி ஓடுகிறார்கள். அங்கொருவன் தலை துண்டிக்கப்பட்ட உடைந்த கூண்டுச் சிலைக்குக் காவிச் சாயம் அடிக்கிறான்.

2

முகக் கவசம் அணிந்த ஓர் ஆணும் பெண்ணும் நடுநிசியில் ஓடுகின்றனர். இருவரையும் துரத்தும் கத்திகள் நந்தனம் சிலையைக் கண்டதும் தரையைத் தொழுதன. ஊரடங்கின் இரவு மயான அமைதியில். நாய் கவ்விய நடைமேடை தவறி விழுந்தது. அண்ணா சாலையில் இருந்து பாரிமுனை நோக்கி உருண்டோடும் இரண்டு பனங்கொட்டைத் தலைகள். சமூக இடைவெளியுடன் உறங்கிய குடும்பம் பெண் குழந்தையைத் தேடியலைகிறது.   

3

மண்டையோட்டை முகக் கவசமாக்கியவனைக் கோயம்பேட்டில் கண்டேன். ஓட்டின் தலைப்பகுதியில் வெட்டுத் தழும்பு. தண்டவாளத்தின் அடியில் கிடைத்ததாம். ஒன்றை எடுக்கும் கணத்தில் ஊற்றாய் மண்டையோடுகள் பெருகப் பெருக, மிரண்டு ஓடிவந்துவிட்டானாம். ஓர் தாய் தண்டவாளத்தில் குப்புறக்கிடந்த அரும்பு மீசையின் பாதத்தைக் கன்னத்தில் அழுத்தி அழுகிறாள். சிதறிய ரத்தத்துளிகளில் எண்ணற்ற ரயில்கள் தடதடத்தன.

4

எரியும் தந்தையின் சிதை மீது பாய்கிறாள் மகள். தொற்றில் இறந்த தந்தைக்கு எழுபது வயது. மகளோ என் தந்தைக்கு ஏழு வயதுதான். சில நேரங்களில் என் வானத்தில் தூக்கிப் போடும் பொம்மை. என் நுரையீரலில் இருந்து ஊதிப் பெருகும் பலூன். பிரசவிக்காத என் குழந்தை. எப்போதும் சுமக்கும் எடையற்ற சுமை. இப்படி இன்னும் நிறையச் சொல்லலாம் என் தந்தையை. அவர் என் தந்தை அல்ல என் குழந்தை; இன்னும் பிரசவிக்கா குழந்தை என்று கதறியபடியே தன் குழந்தையின் சிதையில் விழுந்து எரிகிறாள். மண்டை ஓடுகளில் மலரும் தாமரை மலர்கள், தொழுவத்தில் கிருமி நாசினி தெளித்துக் கொண்டிருக்கின்றன. சிதையின் சுடரை இரவல் பெற்று தேசமே விளக்கேற்ற, பிரபஞ்சமெங்கும் ஒலிக்கின்றன கைதட்டும் ஓசைகள்.  

***

கவிஞர் பச்சோந்தி, இயற்பெயர் ராசு கணேசன். திண்டுக்கல் மாவட்டத்தைச் சேர்ந்த இவர். கணையாழி, விகடன் உள்ளிட்ட இதழ்களில் உதவி ஆசிரியராகப் பணிபுரிந்தவர். தற்பொழுது நீலம் இதழில் துணை ஆசிரியராகப் பணி புரிகிறார். இவரது கவிதைத் தொகுப்புகள் வேர்பிடித்த உலக்கை, அம்பட்டன் கலயம், பீஃப் கவிதைகள் ஆகியன..
ஆசிரியர் தொடர்புக்கு: poetpacho@gmail.com

பாரதிராஜா

ஸ்டெர்லைட் ஆலை மீண்டும் திறக்கப்படப் போகிறது. நான்கு மாதங்களுக்கு மட்டும், அதுவும் ஆக்சிஜன் கிடைக்காமல் செத்து விழும் கோவிட் நோயாளிகளைக் காக்கும் பொருட்டு, ஆக்சிஜன் தயாரிக்க மட்டும் என்று தொடங்கியிருக்கிறார்கள். இது இப்படியே முடியுமா என்றால், அதற்கான விடை நம் எல்லோருக்குமே தெரியும். இது எதில் போய் முடியும் என்பதும் நமக்குத் தெரியும்.

இப்போதைய கோவிட் நோயின் பரவல் வேகத்தையும் கொடூரத்தையும் வைத்துப் பார்த்தால், இந்தியா இதைவிட்டு முழுமையாக வெளியே வர இன்னும் ஓர் ஆண்டாவது ஆகும் போலத் தெரிகிறது. நோம் சோம்ஸ்கியின் சொற்களில் சொல்வதானால், ஒரு கோமாளியின் கையில் சிக்கிச் சீரழிந்துகொண்டிருந்த அமெரிக்கா இப்போது வெகுவேகமாக அந்தக் கொடுங்கனவிலிருந்து மீண்டு வெளியேறிக் கொண்டிருக்கிறது. அது போலவே சென்ற ஆண்டில் கோவிட் வரைபடங்களில் முன்னணியில் இருந்த மற்ற பல நாடுகளும் நிலைமையைக் கட்டுக்குள் கொண்டுவந்து விட்டன.

“பிறப்பிலேயே எதிர்ப்பு சக்தியோடு பிறந்தவர்கள், எங்களை எந்தக் கிருமியும் நெருங்க முடியாது” என்று சொல்லிக்கொண்டு திரிந்தோம். நம் கேடு கெட்ட அரசியலும் அடிப்படை அறிவற்ற நம்பிக்கைகளும் சேர்ந்து விளையாடிய விளையாட்டில், திடீரென்று ஒரே மாதத்தில் நிலைமை தலைகீழாக மாறிவிட்டது. இதுவரை எந்த நாடும் பார்த்திராத அளவுக்குக் கொடுமையான பரவலையும் சாவுகளையும் பார்க்கத் தொடங்கியிருக்கிறோம். இது இன்னும் அதன் உச்சத்தை நெருங்கிவிட்டதா என்று தெரியவில்லை. முழுமையாக ஓர் உலுக்கு உலுக்கிவிட்டுத்தான் அடங்கும் போலத் தெரிகிறது. அதற்குப் பல மாதங்கள் ஆகும். இந்தியாவில் முடிந்துவிட்டாலும், நம்மால் பாதிப்புக்கு உள்ளாகப் போகும் வேறுபல நாடுகள் அதற்குப் பின்பும் பல மாதங்கள் எடுத்துக்கொள்ள வாய்ப்பிருக்கிறது. ‘சீனா வைரஸ்’ என்று சொன்ன வாய்கள் ‘இந்தியா மாற்றுரு’ என்றோ இந்தியத் தலைவரின் பெயரையோ அதற்குச் சூட்டி அழைத்துப் பெருமைப்படலாம். அதற்கும் கூட நம் பீத்தல் பேர்வழிகள் வெட்கமின்றிப் பெருமைப்படவும் வாய்ப்பிருக்கிறது. எனவே நான்கு மாதங்களில் இந்தியாவில் நிலைமை கட்டுக்குள் வந்துவிட்டாலும், உலக நாடுகளுக்கெல்லாம் உதவும் பொருட்டு என்று சொல்லி மேலும் பல மாதங்கள் இது நீடிக்கப்படவே செய்யும். உலகத்துக்கு உதவுவதற்காகத் தொழில் செய்கிற மரபில் வந்தவர்கள் தானே வேதாந்தா குழுமம்!

இது தமிழகத்தில் அடுத்து ஆட்சிக்கு வரும் கட்சியைப் பொறுத்து மாறும் என்று நம்பலாமா? நம்மில் அப்படி நம்புவோரும் இருக்கிறோம். “அப்படியெல்லாம் நம்புவதற்கு நாம் என்ன ஈனா வானாவா?” என்று கேட்போரும் இருக்கிறோம். தமிழகத்தில் ஆட்சி மாறினால் எத்தனையோ கோமாளித்தனங்கள் முடிவுக்கு வரும் என்பதில் எந்த ஐயமும் இல்லை. கோமாளித் திருடர்களை விட அறிவாளித் திருடர்கள் எந்நாளும் கீழ் இல்லை. அதுவும் அறிவாளித் திருடர்களை விடவும் அதிகமாகத் திருடும் கோமாளித் திருடர்கள் – தன்மானமற்ற திருடர்கள் மிகமிக ஆபத்தானவர்கள். ஆனால் தமிழகத்தில் எவர் ஆட்சிக்கு வந்தாலும் இவையெல்லாம் இப்படியேதான் தொடரும் என்கிற ஒரு பெரிய பட்டியலும் இருக்கிறது.

அதற்கு இரண்டு காரணங்கள் இருக்கின்றன. ஒன்று, தமிழகம் இந்தியாவுக்குள் இருக்கிறது. தேசபக்தியோடு இந்தியாவைச் சுரண்டும் அமைப்பு அப்படியே தான் இருக்கப் போகிறது. அதற்குள் இருக்கும் தமிழகத்தைச் சுரண்டும் அமைப்பு மட்டுமே மாறப்போகிறது. நடுவண் அரசு அதிகாரத்தைக் கையில் வைத்துக் கொண்டிருப்பவர்கள் யாருக்கு வலிக்காமல் பார்த்துக்கொள்ள வேண்டும் என்று விரும்புகிறார்களோ அதை மிக எளிதாகச் சாதித்துக் கொள்வார்கள். அதற்கு எதிலும் இறங்கி அடிக்கும் மம்தா பானர்ஜியும் உத்தவ் தாக்கரேயுமே ஈடு கொடுக்க முடியாமல் போராடிக் கொண்டிருக்கிற போது, அதைவிடப் பெரிய எதிர்ப்பு அரசியலை இங்கே அமையப் போகும் திராவிட அரசு செய்ய முடியுமா என்று தெரியவில்லை. அப்படி அவர்கள் துணிந்து இறங்கும் வேளையில், அவர்களை எதை வைத்துக் கட்டிப்போட முடியும் என்ற சூத்திரத்தைக் கை தேர்ந்த ஒரு கூட்டந்தான் மேலே அதிகாரத்தில் இருக்கிறது என்பதும் நமக்குத் தெரியும்.

அடுத்தது, ஸ்டெர்லைட் போன்ற ஒரு நிறுவனம் நடுவண் அரசு அதிகாரத்தைக் கையில் வைத்திருப்பவர்களை மட்டுமே கைக்குள் போட்டுக் கொண்டிருக்கும் என்று நம்புவதும் கற்றுக்குட்டித்தனம். வெளிப்படையாக ஸ்டெர்லைட்டை எதிர்த்துப் பேசும் பல அரசியல்வாதிகளே அவர்களிடம் நன்கொடை வாங்கியவர்களாக இருப்பார்கள் என்பதும் நமக்குத் தெரியும். இருக்கிற எட்டு அல்லது ஒன்பது கட்சிகளில் இரண்டே இரண்டு கட்சிகளைத் தவிர எல்லோருமே ஸ்டெர்லைட்டிடம் கை நீட்டியிருக்கிறார்கள் என்றொரு தகவல் முன்பு கசியவிடப்பட்டது. அப்படிக் கை நீட்டிப் பணம் வாங்கிவிடுபவர்கள் எப்படி எதிர்நிலை எடுக்கிறார்கள் என்பது எல்லோருக்கும் புரிவதில்லை. கை நீட்டிப் பணம் வாங்கிவிட்டால் கண்ணை மூடிக்கொண்டு ஆதரிக்க வேண்டும் என்றில்லை. அது தனிமனிதச் சமன்பாடுகளிலேயே வேலை செய்வதில்லை. அரசியலில் அப்படி இருக்கவே முடியாது. அரசியல் ஆதரவு என்பது கறுப்பு-வெள்ளை நிலைப்பாடு அல்ல. அது வானவில் போன்று பல்வேறு நிறங்கள் கொண்ட நிறமாலை. கண்மூடித்தனமாக ஆதரிப்பது, கண்மூடித்தனமாக எதிர்ப்பது ஆகிய இரண்டுக்கும் நடுவில் எத்தனையோ நிறங்கள் இருக்கின்றன. நடுநிலையாகப் பேசுவது போன்றே ஆதரிப்பது, கடுமையாக எதிர்ப்பது போல் ஆதரிப்பது, சிறிய சிறிய கோளாறுகளை எதிர்த்துக்கொண்டு பெரிய பிரச்சனைகளில் ஆதரிப்பது, எல்லாத்திலும் எதிர்த்துவிட்டு அவர்களின் இருப்பை மட்டும் ஆதரிப்பது, பொதுவாக ஆதரித்துவிட்டுப் பெரிய பிரச்சனைகளில் பின்வாங்குவது என்று பலவிதமான நிலைப்பாடுகள் இருக்கின்றன. இவர்கள் எல்லோருமே தொழில் செய்பவர்களுக்கு வேண்டும். இவர்களுக்கும் நிதி ஆதரவு கொடுக்க முதலாளிகள் வேண்டும். முதலாளித்துவக் கட்டமைப்பில் இதுவொரு தவிர்க்க முடியாத நச்சுக் கூட்டணி.

“ஆக்சிஜன் தயாரிக்க ஸ்டெர்லைட்டைத் திறக்க வேண்டும்” என்ற செய்தி கசியவிடப்படும் போதே, அதற்கான கைக்குள் போடும் (லாபியிங்) வேலைகளும் தொடங்கியிருக்கும். சட்டத்தின்படி, இது போன்ற ஒரு பெரிய முடிவை ஓர் இடைக்கால அரசு தான்தோன்றித்தனமாக எடுக்க முடியாது என்று வைத்துக்கொண்டாலும் (“அப்படியே சட்டத்தின் ஆட்சிதான் இங்கே நடந்து கொண்டிருக்கிறதாக்கும்!” என்று வேறு கேட்பீர்கள்), இது மக்களின் உயிர் தொடர்பான பிரச்சனை என்பதால், மக்கள் நலன் கருதி அவசர கால முடிவாக இதை அறிவித்திருக்க முடியும். அதுவும் இந்தியச் சட்டமன்றங்களில் எந்தச் சட்டமன்றமும் கண்டிராத அளவில் மக்களாட்சிக்கு எதிரான கோமாளித்தனங்களைக் கண்ட வரலாறுடைய நம் சட்டமன்றத்தில், அக்கோமாளித்தனத்தின் வழிவந்த அடிமைக் குஞ்சுகள், அப்படியெல்லாம் செய்யாமல், அனைத்துக் கட்சிக் கூட்டத்தைக் கூட்டி எல்லோருமாகச் சேர்ந்து முடிவெடுத்து அறிவித்திருப்பதை நாம் வரவேற்கத்தான் வேண்டும். சட்டத்தின் ஆட்சிதான் நடந்து கொண்டிருக்கிறது என்று நம்புவதற்கு இதற்கு மேலும் உங்களுக்கு என்ன வேண்டும்?

நீங்கள் எல்லாம் சொல்கிற மாதிரி, நோய் பரவலைக் காரணமாக வைத்து மாநிலத் தேர்தல் முடிவுகளையோ வாக்கு எண்ணிக்கையையோ ரத்து செய்து உத்தரவிட்டு மக்களாட்சியைப் படுகொலை செய்யும் அளவுக்கு மனச்சாட்சி இல்லாத மோசமான நடுவண் அரசல்ல நம்முடையது. நம்புங்கள். இதுவே செய்யாதவர்கள், மொத்த நாட்டையுமே அவசர நிலை அறிவித்து விழுங்கிவிடுவார்கள் என்றெல்லாம் நீங்கள் பேசுவது ஏற்கத்தக்கதாக இல்லை. அதற்கான அவசரமும் இல்லை. இது போன்று அனைத்துக் கட்சிக் கூட்டத்தில் நாட்டு நலன் கருதிச் சொன்ன பேச்சைக் கேட்கிற எதிர்க்கட்சிகள் இருக்கும் வரை சட்டத்தின் ஆட்சியே நடத்த அனுமதிக்கப்படும்.

நான்கு மாதங்களாகத் தொடங்கி, ஏழு மாதங்களாகவோ பத்து மாதங்களாகவோ நீட்டிக்கப்படும் ஆக்சிஜன் தயாரிப்பு, அடுத்து அது தாமிர ஆலையாக இல்லாமல் நிரந்தர ஆக்சிஜன் ஆலையாக மாற உதவினால் அதையும் வரவேற்போம். ஆனால் மெதுவாகத் தாமிரம் தயாரிக்கும் வேலையும் தொடங்கும் அல்லது தாமிர உற்பத்தியைத் தொடங்குவதற்கான தயாரிப்பு வேலைகள் தொடங்கும். முதலில் ஆலையை அரசு கையகப்படுத்தி இருக்க வேண்டும். இப்போது தொடங்கும் வேலையையும் அரசு நடத்தியிருக்க வேண்டும். அதுதான் மக்களுக்காக ஆளும் எந்த அரசும் செய்யும்.

“செத்து மண்ணாகிப் புல் முளைத்திருக்குமே! ஏழு கோடி உயிர்களையும் அவர்கள் தானே காப்பாற்றினார்கள்! அவர்கள் போட்ட உயிர்ப் பிச்சையை வைத்துக்கொண்டு வெட்கமில்லாமல் அவர்களையே ஆலையை மூடச் சொல்கிறீர்களே!” என்று நாளை தமிழர்களின் மனச்சாட்சியை உலுக்குவார்கள் விலை போன மனச்சாட்சிக்காரர்கள். “வேண்டும் வேண்டும்! ஸ்டெர்லைட் வேண்டும்!” என்று வீதிகளிலும் செய்தித் தொலைக்காட்சிகளிலும் சமூக ஊடகங்களிலும் ஆதரவு பெருகுவது போல் கூலிக்கு மாரடிப்பவர்கள் இறக்கிவிடப்படுவார்கள். அப்போது, நீங்களும் நானுமே நமக்கே தெரியாமல், “அவர்கள் சொல்வதும் நியாயந்தானே?” என்று சொல்லத் தொடங்கியிருப்போம்.

அடுத்து வரும் ஆட்சியில் தூத்துக்குடியில் 13 உயிர்கள் கொல்லப்பட்டதற்கு விசாரணைக் குழு அமைக்கப்படுமா? “நீ ஏழு கோடி உயிரைக் காப்பதாக இருந்தாலும் சரி, எழுநூறு கோடி உயிரைக் காப்பதாக இருந்தாலும் சரி, உப்பு தின்றதற்குத் தண்ணீர் குடித்தாக வேண்டும்” என்று சொல்கிற கறார் அனைத்துக் கட்சிக்கூட்டத்தில் கலந்து கொண்ட எந்தக் கட்சிக்காவது இருந்ததா? இழவு வீட்டில் அரசியல் செய்யக் கூடாது என்பார்கள். கொலைகாரனை வீட்டுக்குள் விடுவது, அதுவும் உங்கள் உயிர் காக்க வருகிறேன் என்று சொல்லிக்கொண்டு வருகிற திருட்டுப் பயலான கொலைகாரனை வீட்டுக்குள் விடுவது மட்டும் சரியா என்ன? இதை அதிகாரத்துக்கு வருபவர்கள் நினைவில் வைக்கவும் மாட்டார்கள்; மக்களுக்கும் மறக்கடிக்கவே முயல்வார்கள். அதுதான் அவர்களின் பிழைப்புக்கான வழி. ஆனால் மக்கள் மறக்கக் கூடாது. நீங்களும் நானும் மக்கள்.

இந்நேரம் தமிழக அரசு வேதாந்தா நிர்வாகத்தை அழைத்து, “அடுத்த நான்கு மாதங்களுக்கு ஒழுங்காக ஆக்சிஜன் உற்பத்தி செய்து கொடுங்கள்” என்று சொல்லியிருந்தால், அதற்கு வேதாந்தாவும் பயந்து போய் வந்து வேலையைத் தொடங்கியிருந்தால், அதுதான் வலிமையான அரசாங்கம் நடப்பதற்கான அறிகுறி. அவ்வளவு கூட வேண்டாம். “உங்கள் வேண்டுகோளுக்கு இணங்க, மக்கள் நலன் கருதி, நாங்கள் வேலையைத் தொடங்குகிறோம். நாங்கள் இப்போது செய்யும் உதவியைக் கருத்தில் கொண்டு எங்களின் பழைய பாவங்களுக்கு மன்னிப்பு கொடுக்க வேண்டும்” என்று பேரம் பேசியிருந்தால் கூட ஒரு வியாபாரியின் கோரிக்கையாக ஏற்றுக்கொள்ளலாம். இவர்கள் எல்லோருமாக விளையாடும் விளையாட்டுதான் நமக்குப் பெரும் எரிச்சலூட்டுவது. அவர்கள் வந்து, “நாங்கள் மக்கள் உயிரைக் காக்கத் துடிக்கிறோம்; எங்களுக்கு அனுமதி வேண்டும்” என்று உச்ச நீதிமன்றத்திடம் போய்த் துடிப்பார்களாம். “ஐயா, நீங்களே திறக்கக் கூடாது என்று பூட்டிப்போடச் சொன்ன பாதகர்களின் ஆலை ஐயா இது. இதைத் திறக்க மாட்டோம் ஐயா” என்று அதைத் தமிழக அரசு எதிர்த்து வாதிடுமாம். உச்ச நீதிமன்றம் உடனே தமிழக அரசிடம், “இதை நீங்களே ஏன் எடுத்து நடத்தக் கூடாது?” என்று கேட்டுவிட்டு, அந்தப் பக்கம் திரும்பி, “நீங்கள் நடத்துவீர்களோ அவர்கள் நடத்துவார்களோ யார் நடத்துவார்களோ அதுபற்றி எங்களுக்குக் கவலை இல்லை. ஆனால் ஆக்சிஜன் உற்பத்தி இப்போதே தொடங்க வேண்டும்” என்பார்களாம். இந்த வேகத்தை ஆக்சிஜன் இல்லாமல் மக்கள் செத்து விழுந்து கொண்டிருக்கும் மாநிலங்களில் ஆளும் அரசுகளைக் கேட்பதிலும் காட்டியிருந்தால் எவ்வளவு சிறப்பாக இருந்திருக்கும்!

“ஆக்சிஜன் பற்றாக்குறை என்று ஒன்றே இல்லை; கோவிடால் இந்தியாவில் நடக்கும் சாவுகளே மிகவும் குறைவு; இது எல்லாமே இந்தியா வல்லரசாகி விட்டதைச் சகிக்க முடியாத எதிரிகள் கிளப்பிவிடும் புரளிகள்” என்று ஒரு கூட்டம், சமூக வலைத்தளங்களில் உதவி கேட்கும் பாதிக்கப்பட்டவர்களின் குடும்ப உறுப்பினர்களைக் கூட மிரட்டி அவர்களின் பதிவுகளை நீக்க வைத்துக் கொண்டிருக்கிறது. அதையே இன்னும் பெரிய அளவில் அரசாங்கம் செய்து கொண்டிருக்கிறது. இந்தியா வல்லரசானதை விடக் கொடுமை, தமிழகத்திலும் கேரளத்திலும் உ.பி. மாடல் பற்றியும் குஜராத் மாடல் பற்றியும் பேசிக் கொண்டிருக்கும் கோமாளித்தனம். இதில் அறிவில்லாமல் ஈடுபட்டிருக்கும் கூட்டமும் இருக்கிறது; தான் செய்கிற பரப்புரை எவ்வளவு பெரிய மோசடி என்று தெரிந்தே செய்யும் கூட்டமும் இருக்கிறது. அதற்கான காரணம் என்னவென்றும் நமக்குத் தெரியும்.

இவ்வளவு கீழான வேலைகளையும் கடவுளின் பெயரால் செய்ய முடிகிறது என்றால் இவர்கள் எப்படிக் கடவுளை நம்புபவர்களாக இருக்க முடியும் என்றுதானே உங்களுக்கு வியப்பாக இருக்கிறது! “அது கடவுள் நம்பிக்கையெல்லாம் இல்லைங்க, மதவெறி” என்கிறார்கள் சிலர். “மத வெறியெல்லாம் இல்லைங்க, ஒரு சிலரின் சாதி வெறிக்கு அப்படிப் பெயர் கொடுத்து ஏமாற்றுகிறார்கள்” என்கிறார்கள் இன்னொரு சாரார். “ஒரு வெறியும் இல்லைங்க, எவனோ பிழைப்புக்குப் பண்ற திருட்டு வேலைகளுக்கு ஏமாளிப்பயலுக இந்தப் பெயர்களைச் சொல்லிக்கிட்டுப் பின்னால் போகிறார்கள்” என்றும் சிலர் சொல்கிறார்கள். இதில் எதுதான் உண்மை என்று புரிந்து தொலைய மாட்டேன் என்கிறது நமக்கு. பற்றாக்குறையே இல்லாத ஆக்சிஜனைத் தயாரிக்கவா இவ்வளவு அவசரம்? அதுவும் அதிகம் பாதிக்கப்படாத தமிழகத்துக்குத்தான் முன்னுரிமை கொடுக்கப்படுமாம். அடுத்த நிமிடமே மாடியிலிருந்து ஒரு கத்துகிறான்: “முன்னுரிமையும் கிடையாது. மண்ணாங்கட்டியும் கிடையாது. ஒழுங்கா தயாரிக்கிற ஆக்சிஜனை பூராம் எங்கட்டக் குடுத்துட்டுப் போயிட்டே இரு.”

தூத்துக்குடி மக்கள் நினைத்தால் இதையும் போராடித் தடுக்கலாம். அப்போது என்ன நடக்கும்? ஏற்கனவே ஏற்பட்ட எல்லாத் தோல்விகளுக்கும் கொரோனா மேல் பழியைப் போட்டுத் தப்பியது போல் இந்தியாவில் ஏற்படும் எல்லாச் சாவுகளுக்குமான பழி தூத்துக்குடி மக்கள் மீது போடப்படும். ‘சாகக் கிடக்கிற மக்களுக்குக் கூட உதவ மனசில்லாத இந்தக் கூட்டம் இருந்தால் என்ன கொல்லப்பட்டால் என்ன?’ என்கிற பிம்பம் கட்டியெழுப்பப்படும். அதற்கும் பக்கத்து ஊர்க்காரர்களே பலியாகி ஏசுவார்கள் பேசுவார்கள். எப்படி ஒரு சூழ்நிலையில் கொண்டுவந்து விட்டிருக்கிறார்கள் பாருங்கள். அடுத்து தாமிரம் தயாரிக்க வேண்டிய கட்டாயத்தையும் உருவாக்கிவிடக் கூட வாய்ப்பிருக்கிறது.

ஆலை வேலையைத் தொடங்கும் போது, அவர்கள் என்னென்ன உற்பத்தி செய்கிறார்கள் – என்னென்ன தகிடுதத்தங்கள் செய்யாமல் இருக்கிறார்கள் என்பதைக் கண்காணிப்பதற்கு ஒரு குழு அமைக்கப்பட வேண்டும் என்று கூறப்பட்டிருக்கிறது. அந்தக் குழுவில் மாவட்ட ஆட்சித் தலைவர், காவல் துறைக் கண்காணிப்பாளர், சுகாதாரத்துறை அலுவலர்கள் ஆகியோரோடு சேர்த்து, ஸ்டெர்லைட் எதிர்ப்புப் போராட்டத்தில் ஈடுபட்டவர்கள், சூழலியலாளர்கள், உள்ளூர் மக்கள் போன்றோரின் பிரதிநிதித்துவமும் இருக்க வேண்டும் என்று பேசப்பட்டிருக்கிறது. முதலாளி சார்பாகவும் பிரதிநிதிகள் இருக்க வேண்டும், மக்கள் சார்பாகவும் பிரதிநிதிகள் இருக்க வேண்டும் என்ற நியாய உணர்வோடு செயல்பட்டிருக்கிறார்கள். பாராட்டத்தான் வேண்டும்.

ஆக்சிஜன் தயாரிக்க அனுமதி அளிக்கப்பட்டது என்ற செய்தி வந்தவுடன் வேதாந்தாவின் பங்குச்சந்தை மதிப்பு 5% ஏறியது. அதாவது அதிலிருந்து அந்த நிறுவனத்தில் முதலீடு செய்பவர்களுக்கு ஏதோ நம்பிக்கைக் கீற்று தென்பட்டிருக்கிறது. அதனால்தான். எந்த எதிர்பார்ப்பும் இல்லாமல் கைக் காசைப் போட்டு ஊருக்கு நல்லது செய்யும் நிறுவனத்துக்கு நல்லெண்ணத்தின் அடிப்படையில் ஆதரவு அளிப்பவர்களா இந்த முதலீட்டாளர்கள்? பங்குச் சந்தை எப்படி வேலை செய்கிறது பங்குச் சந்தையில் பணம் போடுபவர்கள் எப்பேற்பட்டவர்கள் என்பதைத் தெரிந்தவர்களுக்கு இது நன்றாகப் புரியும். கடந்த ஐந்தாண்டுகளில் 2018 தொடக்கத்தில்தான் வேதாந்தாவின் பங்கு அதன் உச்ச மதிப்பை அடைந்தது. அந்த ஆண்டு நடுவில்தான் தூத்துக்குடி துப்பாக்கிச்சூடு நடந்தது. அப்போதிருந்து அவர்களுக்குப் பிடித்திருந்த சனி இப்போதுதான் நீங்குவதற்கான அறிகுறி தென்பட்டிருக்கிறது. அப்போதிருந்து 2020 மார்ச் வரை குறைந்துகொண்டே வந்த பங்கு மதிப்பு, அதிலிருந்து மீளத் தொடங்கியது. கடந்த நவம்பரிலிருந்து ஏறுமுகமாக இருக்கிறது. இப்போது எல்லோரும் எழுந்து மூஞ்சியைக் கழுவி நம்பிக்கையோடு உட்கார்ந்து கொண்டிருக்கிறார்கள். நம் உயிரை எடுக்காமல் நன்றாக இருந்தால் நமக்கென்ன கஷ்டம்! ஆனால் இந்தக் கணக்கு அப்படி இல்லையே! அதுதானே நமக்குப் பிரச்சனை.

கடைசியாக ஒரு தகவல். சென்ற மாதந்தான் பத்தாயிரம் கோடி ரூபாய் செலவில் தாமிர உருக்காலை கட்டுவதற்கு இந்திய மாநில அரசுகளில் ஒரு தகுந்த கூட்டாளி தேடிக் கொண்டிருப்பதாக வேதாந்தா குழுமம் அறிவித்தது. அந்த மாநிலம் எதுவாக இருக்கப் போகிறதோ தெரியவில்லை. முப்பது ஆண்டுகளுக்கு முந்தைய தமிழ்நாட்டை விட இப்போதைய தமிழ் நாடு நிறையவே விழித்துக் கொண்டிருக்கிறது. அதனால் அது நாமாக இராது என்று நம்புவோம்.

***

பாரதிராஜா – தூத்துடி மாவட்டம் பூதலாபுரம் கிராமத்தைச் சேர்ந்த இவர். இப்போது பணி நிமித்தம் அமெரிக்காவில் வேலை செய்து வருகிறார். அரசியல் கட்டுரைகள், நூல் விமர்சனங்கள், மொழிபெயர்ப்பு உள்ளிட்ட பணிகளில் தொடர்ச்சியாக பங்களித்து வருகிறார்.